30 kabahayan, nasunog sa Brgy. North Bay Boulevard North, Navotas City

Tinupok ng apoy ang nasa 30 bahay sa isang residential area sa barangay North Bay Boulevard North, Navotas City.

Ayon sa Bureau of Fire Protection (BFP), umabot sa ikalimang alarma ang sunog bago naapula bandang alas 5:45 ng umaga.

Sa kasagsagan ng sunog, nagtutulong-tulong na sa pag-apula ng apoy ang mga lalaking residente gamit ang mga timba at balde para hindi maubusan ng tubig ang mga bumbero.

Patuloy na inaalam ng mga otoridad ang pinagmulan ng apoy at kabuuang halaga ng mga ari-ariang nasunog.

Tiniyak naman ni Navotas City Mayor John Rey Tiangco na nakahanda na ang evacuation centers para sa mga apektadong residente ng malaking sunog.