Franchise ng ABS-CBN, importante pero hindi urgent

Iginiit ni House Speaker Alan Peter Cayetano na importante ang franchise ng ABS-CBN subalit hindi ito urgent.

Ito ang rason ni Cayetano kung bakit hanggang ngayon ay hindi pa gumagalaw sa committee level ang franchise bill ng kapamilya network.

Inamin ni Cayetano na nais na sana nilang simulan ang committee hearing sa ABS-CBN franchise noong Enero subalit lumabas naman ang quo warranto ng Office of the Solicitor General (OSG) laban sa tv network.

Aniya, lubhang nakaapekto ang mga naglabasan na isyu sa quo warranto na hindi maaaring palagpasin basta-basta ng Kamara.

Giit ni Cayetano, lalo ding nakaapekto ang pagsabog ng Taal Volcano at ang issue sa Coronavirus Disease 2019 (COVID-19) para lalong maantala ang pagtalakay ng Kamara sa franchise ng ABS- CBN.