Preliminary investigation laban kay Sen. Pimentel, isasagawa sa buwan ng Mayo

Nakatakdang isagawa ng Department of Justice (DOJ) ang preliminary investigation laban kay Senador Koko Pimentel sa buwan ng Mayo.

Kaugnay ito sa inihain na complaint ni dating University of Makati Law Dean Rico Quicho dahil sa paglabag ni Pimentel sa quarantine protocol sa ilalim ng ipinapatupad na enhanced community quarantine laban sa Coronavirus Disease 2019 (COVID-19).

Matatandaang sinamahan ng senador ang kanyang buntis na asawa sa Makati Medical Center (MDC) noong Marso 24 kahit na naka-home quarantine ito at kalaunan ay nagpositibo sa COVID-19.

Ayon kay DOJ Prosecutor General Benedicto Malcontento, si Assistant State Prosecutor Wendell Bendoval ang hahawak sa kaso ng senador.

Nakatakda namang ibigay ang subpoena sa senador sa susunod na linggo.

Kaugnay nito, umaasa at naniniwala naman si Quicho na mabigyan ng DOJ ng kaukulang legal action ang senador.