Relief efforts sa Kamara, nagpapatuloy para sa mga biktima ng Bagyong Paeng

Patuloy pa rin sa relief efforts ang mababang kapulungan ng kongreso para makapagpadala ng tulong sa mga biktima ng Bagyong Paeng.

Nagkakaisa ang mga staff at empleyado sa Kamara sa repacking ng mga pagkain, vitamins, tubig at gamot na ipapadala sa mga nabagyo.

Ginawa ng mga ito ang hakbang kahit walang pasok ngayong araw sa gobyerno dahil holiday.

Ayon kay Speaker Martin Romualdez, tuloy-tuloy ang kanilang inisyatiba sa Kamara na makatulong sa mga pilipinong nangangailangan na kanilang inumpisahan nito pang weekend.

Lunes ng ika-31 ng Oktubre ay nakapagpadala ang Kamara ng ayuda sa Laguna at inilagak sa tanggapan ni Sta. Rosa Rep. Dan Fernandez, na isa sa mga lugar na matinding tinamaan ng bagyo.