Report ng PNP kaugnay sa Dacera case, hindi lahat mali – NBI

Nilinaw ng National Bureau of Investigation (NBI) na hindi lahat mali ang autopsy report na ipinasa ng Philippine National Police (PNP) kaugnay sa pagkamatay ng flight attendant na si Christine Dacera.

Ito ang binigyang-diin ni NBI- Death Investigation Division Agent Atty. Zulikha Conales sa panayam ng Sonshine radio.

Aniya, “Di po lahat mali. We only have inconsistencies. So ang nakita ho natin na inconsistent duon ay yun nga po, number 1, the alleged urine na wala duon sa urinary bladder but meron naman po kaming nakita. And then, second is yung abrasion. Pero as to the cause of death, we were somehow similar naman.”

Mahaharap ngayon sa mga kasong kriminal ang labing-isang respondent sa kaso ni Dacera.

Ayon kay Justice Secretary Menardo Guevarra, ito ay para makapagsagawa ng preliminary investigation ang prosecutor’s office sa kaso upang maresolba ang kasong rape with homicide na kasama sa reklamong inihain ng NBI sa DOJ.

Kabilang sa mga respondent na inirereklamo sina Mark Anthony Rosales, Rommel Galido, John Pasua Dela Serna III, Darwin Joseph Macalla, Gregorio Angelo Rafael de Guzman, Jezreel Rapinan, Alain Chen, Reymar Englis at Louie de Lima.

Kasama rin sa reklamo ang kanilang abogado na si Neptali Maroto.

Ang mga reklamong inihain laban sa mga respondent ay reckless impridence resulting in homicide dahil sa pagpapabaya kay Dacera, paglabag sa Comprehensive Dangerous Drugs Act of 2002 dahil sa pagdadala at pamimigay ng droga, at perjury.